الرئيسية / المقالات السياسية / جناب القايمقام .. شدگول أني أعفط لو جنابك!!؟

جناب القايمقام .. شدگول أني أعفط لو جنابك!!؟

ukendt.gif

؟

مرات يضطر الأنسان ان يسوي فعل بالنسبة للأخرين موخوش ولكن لو تحقق وتتأمل شوية وتصبر أكيد تنطي كل الحقلصاحب الفعلة!.

أعتقد اكو أخوة قراء يكولون والله كلشي ما أفتهمنه..شبيي أخونا رئيس التحرير أشو گام يسحب خارج ويحچي شيشبيش!!.!!.

أني أگول حقه و ستة ، مع ذلك حتى لا ندخل الى أخذ و رد و سين وجيم خلونا ندخل بصلب الموضوع وبعدين كلشييتبين :رسالة من أحد الأصدقاء(أ .ح) من بغداد:

——————

قبل نصف قرن لو أكثر كان أكو كاتب عدل بأحدى الأقضية ،اذا ضوجه المراجع و ماوصل ويا اية نتيجة.. يعفطله!!.

يعني يجيبه بزيج معتبر يخلي المراجع يدوخ ويستغرب من هالقنبلة و يترك المكان و ما اظن يرجع بعد!!.الناس ضاجت من تصرفات الأخ كاتب العدل ، لذلك شكلوا وفد من جم شخص من شخصيات القضاء وراحوا واجهواالقايمقام واشتكوا له تصرفات موظف حكومي محترم ويه عامة الناس الغلابة ، بصراحة بمجتمعات العراق هذا التصرفمشين و معيب هواية!!.القايمقام طلب الأخ ابو الزيج وعاتبه بقوة وگاله.

يا اخي اكو تصرفات اخرى ، ارجوك مايجوز هالتصرف بدوائر الحكومة اطلاقا. أشرب چايك وارجع الدائرتك وتوكلعلى الله و بعد ما أريد اسمع هيج تصرفات غريبة ، اليوم اجوني شيوخ ووجهاء القضاء واشتكوا واني واعدتهموبالحقيقة ما أريد الخبر يوصل البغداد و نتعاتب!..

والأخ كاتب العدل بعده يم القايمقام واستكان الچاي گدامه بالصدفة دخل مراجع هو ومرته عنده معاملة مالة اثبات نسبلبنته!.

قبل الناس يتأخرون ميطلبون جناسي مثل هالأيام فبسبب التأخير، المعاملة بحاجة الى موافقة القايمقام حتى يثبتلهم شخصية صاحب الجنسية.

القائمقام سأل المراجع: بنتك شسمها؟؟.

اسمها زينب.

شنو أسم أبوها.

محمد

أسم جدها؟.

المراجع مرتبك ونسى اسم ابو ، وهنا التفت على مرته وسألها:

فلانه..اگلج أبوي شسمة؟؟.

المرة هم سكتت ونست الأسم!!.

صار هدؤ بالغرفة والجميع واحدهم يباوع على الموجودين و من غير كلام وعلامات التعجب والأستغراب على وجوههم!!القايمقام ينتظر الرد ولكن ماكو اي رد!!.

هنا أقترب كاتب العدل على القايمقام وشاوره وگاله:

جناب القايمقام هسه شدگول جنابك تعفط لو أني؟؟؟.

القايمقمام وگع من الكرسي وراد يختنك من الضحك وگاله:

لا والله مال انعفطله أني وياااك!!.. روح اخوية روح بالعظيم فلا الومك روح عفط براحتك واني موافق وما الومك بعد ،بس أمانة أريد أسمع زيجك بغرفتي !!.


أخوان السالفة قديمة كلش مع ذلك أني هم عندي حچي و اطلب منكم بالأخص من اهلنا الشرفاء (وهم كثر) لله الحمدطلبين:

أولا: هالحكومة أقصد ( حكومة المنطقة الخضراء) بكل رؤسائها من اول يوم الأحتلال (من كان المستر بريمر الحاكم المطلقو ما يحسب اي حساب لأكبر شوارب!!) الى اليوم.

بعد كل مصيبة ومن يوگع الفاس بالراس يگومون يشكلون لجان ويدورون عن اسباب الكارثة و من المعلوم بسبب جهلهمللحكم يوميا كارثة واخرها حريق مستشفى ابن الخطيب وقبلها عشرات المصايب والكوارث.

واحدهم ( وزراء وبرلمانيين ورؤساء احزاب وأصحاب ميليشيات) يرى الديك حمارا و ماعنده أي تفكير غير مراجعة ( الدخل) وياترى هالشهر شگد كان المقسوم من تهريب وسرقة واتاوات الملاهي و تجارة المخدرات و المنكر وغير أشياءأتحفظ على ذكرها!!.

ومع هذه و هذيچ يطلع بالتلفزيون لو بمجالسهم الخاصة واحدهم عنتر زمانه وحريص على اموال الدولة و الليل كلهماينام بسبب مرض طفل أو انقطاع الكهرباء عن احدى احياء منطقته!!! .

ساكتين مثل ابو المعاملة مع العلم يعرفون اللي يجري ببلدنا المحتل:

هالشباب العاطلة عن العمل و خريج الكلية يبيع گرگري و شعر بنات وبيض اللگ لگ وشربت نومي بصرة بالشورجةوسميط وكاهي ولبلبي بسوگ الصدرية و قلة الأوكسجين بالمستشفيات و أحوال المعتقلين حيث عشرات الأشخاص بغرفةصغيرة و الجوع كاتلهم و( نائب عريف هارب من العسكرية اثناء الحرب مع ايران) وهسه لواء ركن درع و قائد عمليات ومحلل عسكري!! ، وفراش مستشفى يتعين وكيل وزير لو حُميدة أم اللبن و حورية العورة عضوات بالبرلمان ووراهن أفرادحماية بالعشرات منهم حتى ضباط ، و شرطي اول كان مطرود ( قبل الأحتلال) بسبب مخالفاته وهساع عميد بالمرورومسؤل قطاع و راتبه كذا مليون دينار!!.

واحدهم يهمس بأذن زميله بالبرلمان أو مجلس الوزراء أو قادة الميليشيات: البارحة الطيران التركي قصفت قرى ناحيةكاني ماسي ودمرت كذا بيت وقتلت كذا رأس غنم وأبقار وشردت اهلها!!.

لاء وقبل ساعات قصفت القوات الأيرانية قرى قضاء بنجوين و شهربازار و سببت بحرق الغابات ومحاصيلالفلاحين!!…أخذ تصريحات واستنكارات تحت العباية والقبض من دبش!!.

ولكم انتم من ياملة؟؟ ما تتحركون وتضعوا حد لهذه المهازل والبلد حايط انصيص وولاية بطيخ ، شنسوي بتصريحات(أضعف الأيمان) وانتم واحدكم عميل ايراني أو أجنبي حتى العظم يا اولاد الزنى ،اقسم بالله ماعدكم اية صلة لابالعراقولابالدجلة والفرات!!.

ثانيا: ارجوكم دورولي على كاتب العدل صاحب سالفتنا اليوم ياترى عايش لولاء، اذا عايش محتاجه بشغله يروح الىمجلس الوزراء وهناك يعرج على مجلس النواب و ينطيهم المقسوم ( زيج معتبر) يهز الأبنية ويخلي الأخوة هناكيصحون من سُباتهم !!.

أخوية أبو الزيج :هم هالحرامية و الجواسيس يستحقون اللي عندك مو المراجع المسكين اللي كان من يدخل دائرةحكومية (بسبب احترامه للمكان و رهبتها ) ينسى حتى أسمه فكيف بأسم أبو لو عشيرته.

يا عملاء.. يا جواسيس ، وراكم وراكم والزمن طويل وعدنا خُلك حتى لو سنين ولو كلما أغمض عيوني اشوفكم واگفينبالسرة بقفص الأتهام داخل محكمة الشعب وياولكم من قسوة الشعب العراقي والتأريخ يشهد على كلامي!!.

اودعناكم عيوني الى سالفة اخرى بعون الله.

أخوكم / رئيس التحرير

جلال جرمكا

اترك تعليقاً

لن يتم نشر عنوان بريدك الإلكتروني.