الرئيسية / المقالات السياسية / عتيك للبيع !!! اياد يولجو

عتيك للبيع !!! اياد يولجو

اكيد تتذكرون في كركوك أيام زمان كنا ونحن في بيوتنا نسمع احد الجوالين في ازقتنا يصيح باعلى صوته (اللي عنده عتيك للبيع !!) ومنهم شخصية بياع العتيك في مسرحية الخيط والعصفور … يبدو ان أهل العتيك رجعوا ولكن بصورة جديدة !!!
من جانوا اهل العتيك يفترون بدرابين وأزقة كركوك وبغداد وكافة مدن العراق يصيحون (من عنده نخالة ، نعالات، علاليك … للتبديل)
الصغار كانوا لا يفهمون ما هي الفائدة من اعطاء أبو العتيك كونية نعالات عتيكة وهو ينطينا (دولكة جديدة) لو (إنجانة) جديدة !! ومرات يكون ابو العتيك سخي وينطينا سوالف هواية، ومرات يبدع من ينطينا سيت كلاصات وياخذ بدالها كونية نخالة او كونية طحين الحصة !! .
المهم في هذا اليوم عرفنا شنو فائدة (النعال العتيك!!!!) جانوا أهل النعل يموعوهن ويستعملوهن بصناعات بلاستيكية مثلاً تنطيهم اليوم نعال عتيك، رح يبيعوا الك ورة اسبوع على هيئة (إنجانة) او على هيئة (كلاص بلاستك) ! أو أجلكم الله (إبريج) !!… الخ . فالنعال تبين انه نفس النعال ويتحول الى هيئة اخرى وهكذا
اجة على بالي شخصيات سياسية حكمتنا ؛. يوم تلكاه وزير كذا؛ ثاني دورة تلكاه وزير وزارة اخرى؛ وثالثة وزير وزارة اخرى .. وبكل انتخابات يتمَوّع وزير ويرجعلنا وزير معاد .. وكأن العراق ليس فيه الا هذه المجموعة المدورة من النعل العتيگة !!!
ملخص الكلام وزرائنا هم عبارة عن نعال بلاستيكي كل اربع سنين ينعاد اذابته ليكون وزير جديد بمسمى اخر .
ياترى إشوكت يخلص العراق من العتيك
وسياسيين الزبل الدوارة ؟؟؟ .

اترك تعليقاً

لن يتم نشر عنوان بريدك الإلكتروني.

%d مدونون معجبون بهذه:
التخطي إلى شريط الأدوات